ಪ್ರೀತಿಯ ಓಲೆ

ಪ್ರಜಾವಾಣಿ ಪತ್ರಿಕೆಯ ಫೆಬ್ರವರಿ ೧೪ರ ಪ್ರೇಮಿಗಳ ದಿನಾಚರಣೆಯ ಪ್ರಯುಕ್ತ ಆಯೋಜಿಸಿರುವ ಸ್ಪರ್ಧೆಗೆ “ಪ್ರೇಮ ಪತ್ರ” ಬರಿಬೇಕಂತೆ. ಅದಕ್ಕೋಸ್ಕರ ಈ ಓಲೆ. ಇಷ್ಟಪಡ್ತೀರ ಅನ್ಸುತೆ ಒಂದ್ ಬಾರಿ ಓದಿ Please 😛

ನಮಸ್ತೆ ಕಣ್ರೀ…

ಪ್ರೀತಿಯ ಆಲಿಂಗನ, ಅಭಿನಂದನಾಪೂರ್ವಕ ವಂದನೆ. ಹೇಗಿದ್ದೀರ? ಸದಾ ಕಾಲ ನಿಮ್ಮ ಸೌಖ್ಯ ಬಯಸುತ್ತಾ! 🙂

ಯಾರು ನೀವು?? ನನಗೂ ನಿಮಗೂ ಯಾವ ಕಾಲದ ಸಂಬಂಧ?? ನಾನು ಯಾಕೆ ನಿಮ್ಮ ಅತಿಯಾಗಿ ಹಚ್ಚಿಕೊಂಡಿದ್ದೇನೆ?? ನನಗೆ ತಿಳಿಯದ ಹಾಗೆ ನೀವು ನನಗೆ ಹೇಗೆ ಆತ್ಮೀಯಳಾದ್ರೀ?!! ಯಾವ ಊರು, ಏನು ಎತ್ತ, ಯಾವುದೂ ತಿಳಿಯದೆ ನನ್ನನೇಕೆ ಆವರಿಸಿದ್ದೀ?? ನಿಜ ಹೇಳ್ರಿ, ಯಾರ್ರೀ ನೀವು?? 😉

ಇವನಿಗೆನಾಗಿದೆ? ಯಾಕೆ! ಏನ್ ಇಷ್ಟೊಂದು ಏನ್ ಏನೋ ಮಾತಾಡುತ್ತಿದ್ದಾನಲ್ಲ ಅಂತ ಎಣಿಕೆ ಹಾಕಿರ್ತಿಯಾ ಆಲೆ ಅಲ್ವಾ?! ಹಮ್ ಇಷ್ಟಕ್ಕೆ ಹಿಂಗ್ ಅಂದ್ರೆ ಹೆಂಗೇ ಮಹಾರಾಯಿತೀ? ಮುಂದಕ್ಕೆ ಓದಿದರೆ ನಿಜಕ್ಕೂ ಆಶ್ಚರ್ಯಪಡ್ತೀಯ, ಪರಿಚಯವಾಗಿ ನಾಲ್ಕು ವರ್ಷವಾದರೂ ಒಂದೂ ಮಾತಾಡದ್ದಿದ್ದವನು ಇವತ್ತು ಏನ್ ಇಷ್ಟೊಂದು ಅಂತ!

ಕಾರಣ ಇದೆ ಕಣೇ ನನ್ನ ಗೆಳತಿ. ಬಹಳ ದಿನಗಳಿಂದ ನಿಂಗೆ ಪತ್ರ ಬರೀಬೇಕು ಅಂದುಕೊಂಡಾಗ ಕಾರಣಗಳ ಪಟ್ಟಿಯೇ ನನ್ನ ಮುಂದೆ ಬಂದವು. ಏಕೆಂದರೆ ನಿನ್ನ ಹತ್ತಿರ ಸಾವಿರ ಮಾತಾಡಬೇಕು ಎಂದು ನಾನು ಬಂದಾಗ, ಇತ್ತೀಚಿನ ನಿನ್ನ ಮುಗ್ದ ಮೌನ ನನ್ನನ್ನ ಮಾತಾಡುವುದಕ್ಕೆ ಬಿಡದೇ ಕಾಡುತ್ತದೆ. ಅದಕ್ಕೇ ಈ ಪತ್ರದ ಮೊರೆ ಹೊಕ್ಕಿದ್ದೇನೆ, ಎಲ್ಲವನ್ನೂ ಮಾತಿನಲ್ಲೇ ಹೇಳೋದಕ್ಕೆ ಕಷ್ಟವಾಗುವ ಕಾರಣ! 🙂

ಹೌದು ಕಣೇ, ಚಿಟ್ಟೆಯ ರಂಗಿನ ರೆಕ್ಕೆಯಂತಹ ಚಂಚಲ ಮನಸ್ಸು ನನ್ನದು. ಅದು ಹೇಗೆ ನಿನ್ನ ಕಣ್ಣ ಬೇಲಿಯ ಕಾವಲಿಗೆ ಸಿಕ್ಕಿ ಹೋದೆನೋ?! ಮೊದಲ ಹೆಜ್ಜೆಯ ಆಂಗಿಕದಲ್ಲೇ ನನ್ನ ಅಂತರಂಗವನ್ನು ಆವರಿಸಿಕೊಂಡ ಕಲಾಕೌತುಕದ ಸುರಭಿ ನೀನು. ಬದುಕಿನ ಭಾವದ ಪದರ ಪದರವನ್ನು ಚದುಚದುರಿಸಿ, ಬಿಡಿಬಿಡಿಸಿ ಭಾವದ ರಸತಾಳದ ಆಳದವರೆಗೂ ಕೊಂಡೊಯ್ದು ಪ್ರೀತಿಯ ಸಾಗರದಲ್ಲಿ ಮಜ್ಜನ ಮಾಡಿಸಿ, ಎದೆ ಭಾರ ಇಳಿಸಿ, ಹಗುರಾಗಿಸಿ ತೇಲಿಸುವ ಭಾವಯಾನ ನಿನ್ನ ಜೊತೆಯಾಗಿನ ಪಯಣ! 😛

ಆ ನಿನ್ನ ಕಣ್ಣು ಕಮಲ ಅರಳಿದಂತೆ, ನಗು ಬೆಳದಿಂಗಳಂತೆ, ಮಾತು ಮಂಜಿನ ಮಳೆಯಂತೆ, ವದನ ಹುಣ್ಣಿಮೆಯ ಚಂದ್ರನಂತೆ, ಆಂತರ್ಯ ಬೆಳದಿಂಗಳ ಹಾಲಿನಂತೆ, ನಡೆ ತಿಳಿ ಗಾಳಿಯ ತೇವ ಆತ್ಮ ತಾಕಿದಂತೆ, ಆ ಹಾವ-ಭಾವ ಹಾಲು-ಸಕ್ಕರೆ ಮೆಲ್ಲಿದಂತೆ!! ಮುಮ್ಮುಂದಿನದು ಭಾವ ಪ್ರವಾಹದ ಜೀವ ವೈಭವ:  ಅನಿರ್ವಚನೀಯವಾದ ಭಾವವನ್ನು ನನ್ನಲ್ಲಿ ಉಕ್ಕಿಸಿದ ಕಲಾಕಾರಂಜಿ; ನನ್ನ ಅಪರಂಜಿ ನೀನು… ನನ್ನನ್ನು ಕಾಡುವ ಪ್ರತಿಯೊಂದು ಪ್ರಶ್ನೆಗಳಿಗೂ ಆಹ್ಲಾದಕರವಾದ, ಭಾವಪೋಷಕವಾದ ಲಯಗಾರಿಕೆಯ ಸಮ್ಮೋಹಕವಾದ ಉತ್ತರ ನೀನೇ ಕಣೇ ನನ್ನ ಒಲವೇ! 🙂

ಆ ನಿನ್ನ ಮುಗುಳ್ನಗೆಯಿಂದ ಭಾವವು, ಭಾವದಿಂದ ಜೀವವೂ ನನ್ನಲ್ಲಿ ಅನ್ಯೋನ್ಯವಾಗಿ ಉತ್ ಸ್ಪೂರ್ತಗೊಂಡಿದೆ. ಆ ನಿನ್ನ ತನ್ಮಯತೆ ಸಮೃದ್ಧವಾದ ಅವಧಾನಶೀಲತೆ 🙂

ನೀನು ಸ್ಪೂರ್ತಿಯ ಚಿಲುಮೆ, ಭಾವನೆಗಳ ಮಿಲನ; ಪ್ರೀತಿ, ಪ್ರತಿಭೆ ಮತ್ತು ಸೌಂದರ್ಯದ ಸಮ್ಮಿಲನ, ಬದುಕಿನ ಭಾವಗಳ ಜೀವಂತ ಅಭಿವ್ಯಕ್ತಿ; ಚಿರಂತನ ಚೂತನವನ ಚೈತ್ರ; ಎಲ್ಲಕ್ಕಿಂತಾ ಮಿಗಿಲಾಗಿ ಚೈತನ್ಯ-ಶಾಂತಿಯ ಸಾಕ್ಷಾತ್ಕಾರ”

ಬತ್ತಿ ಹೋದ ಬಾವಿಯಂತಿದ್ದ ನನ್ನ ಬದುಕಿಗೆ, ನೀರಿಲ್ಲದ ಮೀನಿನಂತೆ ವಿಲವಿಲ ಒದ್ದಾಡುತಿದ್ದ ನನ್ನ ಮನಸಿಗೆ ಪ್ರೀತಿಯ ನೀರೆರೆದು ನನ್ನಲ್ಲಿ ನಿಜವಾದ ಜೀವನದ ಅರ್ಥವನ್ನು ಕಳಿಸಿದ ಗುರುವೂ ನೀನೇ. ಇಂತಿಪ್ಪ ಭಾವಗಳ ಅನಂತ ಯಾತ್ರೆಯಲ್ಲಿ ನನ್ನನ್ನು ಕರೆದೊಯ್ಯುವ ನಿನ್ನ ಕಣ್ಣಿನ ಭಾವಾಭಿವ್ಯಕ್ತಿಯ ಸಾಮರ್ಥ್ಯ ಮೊಗೆದಷ್ಟೂ ಜಿನುಗುವ ಅಂತರ್ಜಲ. ನನ್ನ ಜೀವಜಲ ಮತ್ತೆ ಆತ್ಮಬಲ. ಏಕೆಂದರೆ ಈ ಬದುಕೆಂಬ ಮರಳುಗಾಡಿನ ನನ್ನ ಓಯಾಸಿಸ್ ನೀನು ಕಣೇ!! 🙂

ಕಡಲಲ್ಲಿ ಹುಟ್ಟುವ ಅಲೆ ದಡ ದಾಟಲಾರದೆ ಅಸಹನೆಯಿಂದ ಕದಲುತ್ತಾ, ನಿಸ್ಸಹಾಯಕವಾಗಿ ವಾಪಸ್ಸ್ ಕಡಲಿನೊಳಗೆ ಲೀನವಾದಂತೆ, ನಾನು ಮತ್ತೆ ಮತ್ತೆ ನಿನ್ನ ನೆನಪುಗಳಿಂದ ತಪ್ಪಿಸಿಕೊಳ್ಳಲು ಪ್ರಯತ್ನಿಸಿದಾಗೆಲ್ಲ ನಿನ್ನ ನೆನಪನ್ನುಂಡು, ನೆನಪ್ಪನ್ನೇ ಹಾಸಿ, ನೆನಪನ್ನೇ ಹೊದ್ದು ಮಲಗಿ, ನೆನಪುಗಳನ್ನೇ ಕನವರಿಸಿ ನೊಂದುಕೊಂಡಿದ್ದೇನೆ. ನಿನ್ನ ನೆನಪಿನಿಂದಲೇ ಬದುಕಲು ಕಲಿತಿದ್ದೇನೆ. ನಿನ್ನ ನೆನಪುಗಳಿಗೆ ನನ್ನ ಎದೆಯ ಅಂತರಂಗದ ಬಾಗಿಲು ಸದಾ ತೆರೆದುಬಿಟ್ಟಿದ್ದೇನೆ!

ಏಕೆಂದರೆ; ಹಳೆಯ ಹಳಿಯ ಮೇಲೆ ಸವೆದು ಹೋದ ರೈಲು ನವೆಯುತ್ತಾ ಸಾಗಿ ಅದೇ ಹಳೆಯ ನಿಲ್ದಾಣಗಳೆಂಬ ಏಕತಾನತೆಯಲ್ಲಿ ಕಳೆದು ಹೋಗುತ್ತಿದ್ದ ನನ್ನ ಬದುಕಿನ ಹಳಿ, ರೈಲು, ನಿಲ್ದಾಣಗಳನ್ನು ಭಾವನೆಗಳೆಂಬ ಜೀವ ಕಟ್ಟಿ ಹೊಸದಾಗಿ ನಿರ್ಮಿಸಲು ಪ್ರೇರೇಪಿಸುವುದೇ ಆ ನಿನ್ನ ನೆನಪುಗಳು!! 🙂

“ನಿನ್ನ ಸವಿನೆನಪೆ ಮನದಲ್ಲಿ ಆರಾಧನೆ

ಪ್ರೀತಿಯ ಸವಿಮಾತೇ ಉಪಾಸನೆ”.

ಹೌದು ಕಣೇ; ಬದುಕಿಗೆ ಸಾವಿರ ಸಾವಿರ ಕವಲುದಾರಿಗಳಿವೆ. ಆದರೂ ನಾನು ಪ್ರೀತಿಯ ಹಾದಿಯಲ್ಲಿ ನಿನ್ನ ಹುಡುಕುತ್ತ ಬಂದವನು! ಸಾವಿರ ಸಾವಿರ ದಿನಗಳು ಉರುಳಿದರೂ ನಿನ್ನ ಹೊರತು ಮತ್ತೊಬ್ಬರು ನನಗಿಲ್ಲವೆಂಬಂತೆ ನಿನ್ನೆಡೆಗೆ ನಡೆಯುತ್ತಿದ್ದೇನೆ.

ಪ್ರತಿಕ್ಷಣ ಇಂತ ನೂರಾರು ಭಾವನೆಗಳು ಕಾಡುತ್ತವೆ. ಅವಕ್ಕೆಲ್ಲ ಉತ್ತರ ನಿನ್ನ ಸಮ್ಮುಖದಲ್ಲಿ ಸಿಗುತ್ತೆ. ನಿನ್ನ ಚಿಗುರು ಬೆರಳ ತಣ್ಣನೆಯ ಸ್ಪರ್ಶದಲ್ಲಿ ಸಿಗುತ್ತದೆ. ಅದೇ ನನ್ನ ಆತ್ಮಬಲ, ಮತ್ತೆ ಜೀವಜಲ!! ನೀನು ನನ್ನ ಜೊತೆಯಾಗಿರುವಷ್ಟು ಕ್ಷಣ, ಜಗತ್ತನ್ನೇ ಅಂಗೈಯಲ್ಲಿ ಹಿಡಿದಷ್ಟು ಸಂತೋಷ ನನ್ನದಾಗಿರುತ್ತದೆ ಕಣೇ ನನ್ನ ಗೆಳತಿ:) ಯಾವಾಗಲೂ ನಿನಗೆ ಒಳ್ಳೆಯದನ್ನೇ ಬಯಸುವ ನಾನು, ನಿನ್ನ ಪ್ರೀತಿಸುವುದರಲ್ಲಿ ಥೇಟ್ ನಿನ್ನ ಅಮ್ಮನೇ ಕಣೇ 🙂 ಸಮುದ್ರವೇ ನಾಚಿಸುವಷ್ಟು ಇಷ್ಟಪಡುವ ನಾನು, ನೀನು ಇಲ್ಲದ ನನ್ನ ಜೀವನವನ್ನು ಕಲ್ಪಿಸಿಕೊಳ್ಳಲು ಸಾಧ್ಯವಿಲ್ಲ. 🙂

ನೀನಿಲ್ಲದ ಬದುಕು ಎಷ್ಟೊಂದು ಕೃತಕ ಗೆಳತಿ?? ನಿನ್ನನ್ನು ಮರೆಯುತ್ತೇನೆ ಅಂತ ಹೊರಡೋದೇ ಶುದ್ದ ಸುಳ್ಳು, ಅಪ್ಪಟ ಆತ್ಮವಂಚನೆ!! 😦

ಹ ಹಾ, ತಲೆಮೇಲೆ ಕೈ ಇಟ್ಟು ಕೂತಿದಿಯಾ ಅಂತ ನಂಗೊತ್ತು. ಹು ಹು ಅಂತದ್ದೆನಿಲ್ಲ ಕಣೇ, ಮುಗ್ಧವಾಗಿ ಹೇಳ್ಬೇಕು ಅಂದ್ರೆ ನಾ ನಿನ್ನ ಪ್ರೀತಿಸ್ತೀನಿ! 🙂

ಸಾಗರ ಹುಣ್ಣಿಮೆ ಕಂಡು ಉಕ್ಕುವ ರೀತಿ ನಿನ್ನನು ಕಂಡ ದಿನವೇ ಹೊರಹೊಮ್ಮಿತು ನಿನ್ನ ಮೇಲಿನ ನನ್ನ ಪ್ರೀತಿ. ಹೌದು ಕಣೇ, ನೀನು ಜತೆಯಾದ ದಿನದಿಂದ ನನ್ನ ಪ್ರತಿನಿತ್ಯದ ಬೆಳಗುಗಳು ಇನ್ನಷ್ಟು ಸುಂದರವಾಗಿವೆ, ಮಧುರವಾಗಿವೆ, ಜೀವನ ಮುನ್ನಡೆಸ್ಸೋಕ್ಕೆ ಒಲವಿನ ದೋಣಿ ನನ್ನದಾಗಿದೆ ಎಂಬ ಹುರುಪಿದೆ. ನನ್ನೀ ಹಾಯ ದೋಣಿಯ ಪಯಣಿಗಳಾಗ್ತೀಯಾ ಅಲ್ವಾ?

ನಿನ್ನ ಪ್ರತ್ಯುತ್ತರಕ್ಕೆ ಸ್ಯಾಂಕಿ ಕೆರೆಯ ದಡದಲ್ಲಿ ಕಾಯುತ್ತಾ ಕುಳಿತಿರ್ತೀನಿ ಪ್ರತಿ ಸಂಜೆನೂ. ನಿನಗೆ ಬೇಕಾದಷ್ಟು ಸಮಯ ತೆಗೆದುಕೊಂಡು, ಸಮಾಲೋಚಸಿ ಬಂದು ಹೇಳು ನಿನ್ನ ಅಭಿಲಾಷೆಯನ್ನ. 🙂

ಹ ಹಾ ಏನ್ ಇಷ್ಟೊಂದು ವಿನಯವಾಗಿ ಕೇಳ್ತಾ ಇದಾನೆ ಅಂತ ಅಂದುಕೊಳ್ತಾ ಇದ್ದೀಯ ಅಲ್ವಾ? ಗೊತ್ತಲ್ಲಾ ನಾವ್ ಹೆಂಗೆ ಅಂದ್ರೆ, ಆಗಲ್ಲ ಅಂದ್ರೆ ಹೊತ್ತಾಕೊಂಡ್ ಬರ್ತಿವೀ ಅಂತಾ! 😉

ಸುಮ್ನೆ ತಮಾಷೆಗೆ ಹಾಗ್ ಹೇಳ್ದೆ ಮಹಾರಾಯಿತಿ! ಕಾಯುತ್ತ ಇರ್ತೀನಿ, ತಡ ಮಾಡಬೇಡ. 🙂

ಇಂತಿ ನಿನ್ನ ಪ್ರೀತಿಯ
ಹುಡುಗ. 🙂

Advertisements

ನಿಮ್ಮ ಅನಿಸಿಕೆ ತಿಳಿಸಿ

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s